عسانی
عسانی
عسانی ما اجیت اویاچ یمه الشارع المیشوم
وعسانی انعمیت اعیونی ولاعینچ تخر ادموم
عسانی ابدالچ انسطریت وتتراکم علیه اهموم
ییمه ابطیحتچ عالگاع خلص عمری ابذاک الیوم
یاغریبة المدینه یمه یا زهرا الحزینه
*****
عسانی اظلوعی تتهشم ولا ظلعچ صبح مکسور
ویریت النار بیه اتشب ولا ثوبچ یضل مسعور
علی وجهی لطمت اسنین من شفت الوجه مسطور
دنیا الداخت ابعینچ الحد الموت بیه اتدور
صدری ریته امهشمینه یمه یا زهرا الحزینه
*****
عسانی ما مشه جدمی ییمه ولا خطه خطوه
وخلف اجنازتچ امشی یوردة حیدره الحلوه
عسانی ماصبح لیلی ولا شاف الجفن غفوه
من شفت العقیله اتصیح یمه وعالارض تهوه
یا املنه الشایلینه یمه یا زهرا الحزینه
*****
عسانی ما شفت دمعات حیدر من تهل حمره
حرگنی اموادعه من ایصیح الله اویاچ یالزهره
عسانی ما شفت جسمچ ییمه نایم ابگبره
الله ایساعد المظلوم ابونه واشکبر صبره
یا سعد حیدر علینه یمه یا زهرا الحزینه
*****
عسانی ما رجعت البیت و اشوفه مظلم وخالی
اشم ریحت عطر ثوبچ ییمه ودمعتی اتبلالی
عسانی ما لمست الباب ودفعاته اتراوالی
آنه ابچی علی حاله وهوه یبچی الحالی
بیتچ ایجاوب انینه یمه یا زهرا الحزینه
*****
اضم عبراتی بظلوعی تفضحنی دمع عینی
واداوی اجروحی بجروحی ومرهم صایر اونینی
کتبت ابدفتر احزانی یمظلومه علی اسنینی
وسکنت ابوادی الامی وصرخاتچ تماسینی
یا دمع لیلی وحنینه یمه یا زهرا الحزینه
*****
الشاعر والرادود سید مصطفی الحسینی